A Confederación ASPACE elaborou un estudio sobre a implantación das TIC nas súas entidades co obxectivo de sentar as bases do futuro Plan Operativo de Novas Tecnoloxías
A Confederación ASPACE inaugura 2011 co firme compromiso de impulsar a presenza das novas tecnoloxías entre as súas asociacións. O primeiro paso foi a elaboración dun estudio que, avalado pola Universidade Rovira i Virgili, radiografía a incidencia e presenza das tecnoloxías de apoio e de comunicación alternativa aumentativa, nas entidades adscritas a ASPACE.
Un total de 23 entidades de ASPACE participaron neste estudio, impulsado pola Comisión de Novas Tecnoloxías (NN.TT) e dirixido por Agustí Solanas Gómez e Josep María Mateo-Sanz, pertencentes aos departamentos de Enxeñería Informática e Matemáticas, e da Área de Estatística e Investigación Operativa da Universidade Rovira i Virgili.
Para César Mauri, presidente da Comisión de NN.TT da Confederación ASPACE, este estudio supón “un avance cuantitativo e cualitativo que permitirá, a partir da análise e a reflexión, potenciar a participación, inserción e autonomía das persoas con parálise cerebral e as súas familias a través das TIC (Tecnoloxías da Información e a Comunicación)”.
Mauri tamén considera que “a colaboración entre as asociacións e federacións que integran a Confederación ASPACE, os seus profesionais e o mundo universitario é fundamental para garantir un uso óptimo do potencial que ofrecen as novas tecnoloxías. Todo isto sobre a base da capacitación e formación dos traballadores, as familias e as persoas do colectivo”.
O informe sentará as bases para a creación do Plan Operativo de Novas Tecnoloxías, que se elaborará este ano e terá como obxectivo incrementar a presenza das novas tecnoloxías entre as máis de 70 entidades que forman a Confederación ASPACE.
Entre outros obxectivos, o proxecto busca mellorar os equipamentos informáticos básicos, tanto no número de ordenadores como no acceso a internet, e optimizar o soporte técnico-informático dos centros. Ademais, terá especial importancia la dispoñibilidade de elementos de tecnoloxías de apoio (TA) e de comunicación alternativa aumentativa (CAA) nos xoguetes adaptados, botóns específicos, sistemas de sinalización, plafóns de comunicación electrónicos ou teclados alternativos.
Outra das liñas de actuación fundamentais será fomentar a cultura, colaboración e asesoramento mutuo, a través das ferramentas en liña e encontros precisos. A inversión en I+D, a formación de persoal especializado en TA e CAA; a formación dos familiares por parte dos expertos dos centros pertencentes á Confederación ASPACE, e a posibilidade de que ditas asociacións dispoñan de asesoramento técnico especializado, tamén son obxectivos importantes para acadar nos vindeiros anos.
