Os grupos de traballo de Talento ASPACE coordinados por ASPACE-Galicia reúnense en APCA Alicante
APCA Alicante (Asociación de Paralíticos Cerebrais de Alicante) acolle hoxe a reunión do ‘Programa Talento ASPACE’ de Confederación ASPACE coa participación dos grupos de traballo coordinados por Federación ASPACE-Galicia. O ‘Programa Talento ASPACE’ é unha ferramenta para compartir o coñecemento e as boas prácticas na xestión dos servizos ASPACE, e crear redes de comunicación entre os profesionais das distintas entidades. Federación ASPACE-Galicia coordina, dentro do programa, tres grupos de traballo centrados en:
- Modelos de atención.
- Participación de persoas con parálise cerebral con grandes necesidades de apoio.
- Sexualidade e afectividade.
E nos grupos de traballo participan profesionais das nosas asociacións federadas – Amencer ASPACE, APAMP Vigo e ASPACE Coruña – xunto a profesionais de APCA Alicante e ASPACE Asturias. O que constitúe, finalmente, unha forma de xestionar o coñecemento e o talento acumulado no movemento ASPACE para así acadar de forma progresiva cotas máis elevadas de excelencia na xestión.
