Un mozo pontevedrés con parálise cerebral participará no XVIII Medio Maratón Gran Bahía de Vigo

+A carreira, máis coñecida como VIG-BAY, terá lugar o próximo domingo, 25 de marzo, entre as localidades de Vigo e Baiona
+Nesta edición, VIG-BAY e a federación ASPACE-Galicia puxeron en marcha a iniciativa Dorsal Solidario para recadar fondos para o colectivo de persoas con parálise cerebral en Galicia.

         Antonio Jesús Martínez, un mozo pontevedrés afectado po parálise cerebral, será o único corredor con discapacidade que participará na popular carreira VIG-BAY, un medio maratón que une as localidades de Vigo e Baiona.

 

         Non é a primeira vez que Antonio Jesús participa no Medio Maratón Gran Bahía de Vigo, completando con éxito os máis de 20 quilómetros que percorren a costa desde a praia de Samil ata o centro de Baiona. O deporte constitúe para el un xeito de demostrar que as persoas con discapacidade, neste caso con parálise cerebral, están capacitadas para se enfrontar aos retos que se propoñan co esforzo e os apoios precisos. “Non queremos que a sociedade nos trate dun xeito especial. Simplemente queremos que nos dean a oportunidade de demostrar todo do que somos capaces”, afirma.

          Este ano o significado desta participación é especial, xa que Antonio Jesús correrá en representación de ASPACE-Galicia, da que é socio e usuario. Nesta XIII edición, a organización da carreira e ASPACE-Galicia poñen en marcha a iniciativa Dorsal Solidario, co obxectivo de recadar fondos destinados integramente a financiar programas e actividades orientados a mellorar a calidade de vida do colectivo de persoas con parálise cerebral en Galicia.

         Un total de 44 persoas uníronse, ata este momento, a esta iniciativa solidaria, entre elas o Conselleiro de Presidencia, Administracións Públicas e Xustiza, Alfonso Rueda e o presidente do Grupo Vieira, Eduardo Vieira Montenegro.

         A carreira celébrase o próximo domingo, 25 de marzo, a partir das 10 horas, e a saída efectuarase desde o Museo Verbum – Casa das Palabras, onde corredores de toda Galicia daranse cita para competir un ano máis neste popular medio maratón.